Bjerwałdski jězor je najwjetša wodźizna w sakskim dźělu łužiskeje jězoriny, haj, samo najwjetši jězor Sakskeje. Něhdźe 13 km2 wulka je płonina nětko z wodu pjelnjeneje něhdyšeje Bjerwałdskeje brunicoweje jamy. Wjace hač 1.850 sportnišćow by na njej městno měło. W jamje su mjez 1976 a 1992 ca. 185 milionow tonow brunicy wudobywali, kotraž bu přewažnje w Hamorskej milinarni zmilinjowana. 1993 započa so saněrowanje jamy, w kotrejž běchu wudobywanje dočasnje skónčili. Štyri lěta pozdźišo počachu jamu zapławjeć: z wodu Sprjewje, Schulenburgskeho kanala a Dyrbachskeje rěčki. Bjerwałdski jězor móže hač do 174 milionow kubiknych metrow wody wopřijeć.
Woda jězora ma pH-hódnotu nad 6. To je za zapławjenu něhdyšu brunicowu jamu dosć njewšědne. Přetož z nasypow wupłokane železo a syrik wuskutkujetej samo na sebi kisały miljej. Pola Delnjeho Wujězda, kiž tohorunja do gmejny Hamora słuša, ćeće čerstwa woda Sprjewje do jězora. Tež dźakowano tomu ma woda tajku wuběrnu kwalitu.
A tohodla je jězor tež woblubowane kupanišćo. Tři kupanske přibrjohi so poskićeja: w Hamorje, Delnim Wujězdźe a w Klětnom. Nimo toho móža so wočerstwjenje pytacy we wšelakich družinach wodosporta wupruwować. Přistawne mosty w Klětnom, Delnim Wujězdźe a Hamorje skićeja pasažěrskemu łódźnistwu optimalne wuměnjenja
Na Hamorskim boku wabja přibrjóžna promenada, tekstilny a FKK-přibrjóh kaž tež wotrězk za psy, přistawnišćo, Turistiski informaciski centrum, komfortabelne campingowanišćo a arena za inlineskatowanje. Nimo toho je tam twórba krajinoweho wuměłstwa w podobje čłowječeho wucha, do kotrehož je „Dźiwadło we wuchu“ zapołožene, hdźež ma 270 wopytowarjow městno. A jězor wobdawa 23 km dołhi asfaltowany kołopuć. Dalše informacije wo jězoru a móžnosćach jeho wužiwanja hlej pod www.baerwalder-see.eu
Prěni raz pisomnje naspomnjeny bu Hamor 1366 w zwisku z tamnišim hamornikom. Hač do 1884 tu brunu rudu předźěłowachu. Jako so 1965/1966 twar milinarnje započa, wjele ludźi do tuteje holanskeje wsy přićahny. Dalše informacije wo Hamorje hlej pod www.boxberg-ol.de.