Mjeno Delni Wujězd wopisuje wujězd z Budyskich honow do lěsa resp. do hole. 1342 so wjes prěni raz pisomnje naspomnja. W bliskosći nimo wjeduca Sólna dróha běše něhdy kaž pulsěrowaca žiła. W 15. lětstotku nasta we Wujězdźe ryćerkubło, kotrež wuwiće we wsy bytostnje sobu postajowaše. Mjez 1711 a 1716 bu cyrkej, kotraž so dźensa hišće wužiwa, twarjena. Mjez 1738 a 1742 přidružištej so hród a barokny park. Ochranowska bratrowska wosada wudźeržowaše tu we 18. lětstotku internat. Tam bě tež załožićel krajinoweju parkow w Mužakowje a Rogeńcu Hermann von Pücker-Mužakowski ze šulerjom.

Nimo toho je Delni Wujězd z wosobu basnjaceho hajnika zwjazany, Gottfriedom Unterdörferom. Stajna wustajeńca domizniskeho towarstwa na njeho jako přećela přirody a literatury dopomina. Štóž chce sej ju wobhladać, njech so w hosćencu přizjewi.

Sewjernje Delnjeho Wujězda leži nimale 1.300 ha wulki Bjerwałdski jězor, kotryž twori juchowuchodne wójmidło rjećaza jězorow łužiskeje jězoriny. Jězor nasta z Bjerwałdskeje brunicoweje jamy, hdźež běchu wot 1976 do 1992 brunicu wudobywali. Mjeztym dospołnje z wodu napjelnjeny jězor ze swojimi třomi kupanskimi přibrjóhami je mjez domoródnymi a turistami jara woblubowany. Turistisku infrastrukturu tam tuchwilu z połnej paru natwarjeja.

Dalše informacije hlej pod www.boxberg-ol.de a www.baerwalder-see.eu.