Kaž susodny Złokomorowski jězor w Braniborskej słuša Lejnjanski jězor w Sakskej k wodźiznam łužiskeje jězoriny, kiž su turistisce najbóle wuwite. Na južnym brjoze něhdyšeje brunicoweje jamy, kotraž bu z wodu pjelnjena, nastawa moderna infrastruktura. Hnydom při kupanskim přibrjoze z krasnym drobnuškim pěskom je přistawny móst, hdźež wot julija 2016 solarny katamaran „Aqua Phönix“ łódźnicy Löwa přistawja.

Wodosport je w Lejnom wažna wěc. Jadro tworitej wodosportowy centrum a wotpočnišćo za po wodźe pućowacych na zapadnym brjoze pod swětłownju, štož je jara markantny kompleks hotelow a gastronomije. Na arealu startuja a kónča wšelake němske a mjezynarodne regaty.

Hnydom pódla zmóžnja team „grill & chill“ kulinariske wulěty po jězorje, a na terasy z widom na jězor a w swojej kofejowni so wo wokřewjenje hosći stara.

We wsy přeprošujetej hosćencaj „Podkopkowa lampa“ a „Ulfowa bróžeń“ ze swojej indiwidualnosću a swojimi specielnymi kulinariskimi poskitkami na přijomne hodźinki.

Wšelake družiny wodosporta, stand-up-padlowanje, šula za surfowanje a wódny ski, jězdźenje z wupožčenym čołmikom po jězoru – to wšo wopytowarjow runje tak sem wabi kaž skatowanje a kolesowanje kołowokoło jězora.

Hotel „Swětłownja“, płuwace domy a kopica prózdninskich bydlenow hosćom dlěši přebytk w Lejnom zmóžnjeja.

Tójšto móžeš sej z jězora sem wotkrywać, ale runje tak tež na kraju.

A směš so wjeselić na wuměłske projekty, daloko w krajinje widźomne markantne dypki, indwidualnosć a na nastawace nowe turistiske poskitki!