Bjezdowy su jedna z mało wsow we łužiskej jězorinje, kotrež hnydom tři wjetše wodźizny wobdawaja: w zapadźe Parcowski, we wuchodźe Južny Blunjanski a w juchowuchodźe Nowułučanski jězor. Turistisce so tuchwilu jenož Parcowski jězor wužiwa. Wón bě z něhdyšeje brunicoweje jamy Škodow nastał a skića wjacore atrakcije. Jedna wosebitostka je dwaj kilometraj dołha, ale jenož 400 metrow šěroka połkupa, kotraž kaž pokazowak do jězora saha. Połkupa je přirodoškitny areal a symbol łužiskeje jězoriny. Markantnosć při Parcowskim jězorje je nimo toho planowany přistaw z přistawnym mostom za łódźe, płuwacy dom w susodstwje kaž tež centrum płachtakowanskeho sporta.

Direktnje na zapadnym kóncu wjesneje dróhi je wopomnišćo za wjes Parcow, kotraž bu spočatk 1970tych lět Škodowskej jamje woprowana. Bjezdowy prezentuja so jako wjes alejow. Stare dubiska a lipy kaž tež młode platany skićeja chłódk na horcych lětnich dnjach. Markantne su nimo toho mnohe tři- a štyristronske statoki, kiž su za srjedźnu Łužicu typiske.

Bjezdowy słušeja wot 1995 do gmejny Halštrowska Hola, kotraž je ze 129 kwadratnymi kilometrami druha najwjetša komuna w Budyskim wokrjesu. Gmejna ma dźewjeć wsow. Serbske nałožki a tradicije su so w nich hač do dźensnišeho zachowali. W Bjezdowach w februaru abo měrcu campruja, we wałpornej nocy meju stajeja a něšto njedźel pozdźišo mjetaja a nazymu swjeća kermušu.