Kanal 1 je z wotstawkom najdlěši we łužiskej jězorinje. Na dołhosći 2.750 metrow přemosća wotstawk mjez Sprjewinodołskim jězorom we wuchodźe a Zabrodskim jězorom w zapadźe. Nimo toho je z nimale 30 metrow dołhim přepławom wuhotowany, z kotrymž so rozdźělna wysokosć tuteju wodźiznow wuruna.
Historisce widźane twori kanal zwisk mjez něhdyšej, nětko z wodu pjelnjenej brunicowej jamu Sprjewiny Doł-sewjerowuchod a Sprjewiny Doł. Sydomapoł lětdźesatka su tule brunicu wudobywali – dobrych 382 milionow tonow. K přirunowanju: To je telko kaž waha dweju milionow módrych wjelrybow, kiž liča do najćešich zwěrjatow na swěće (jedna waži 190 tonow). Surowa brunica bu hłownje w tehdyšim kombinaće Čorna Pumpa a w Dubrawskej milinarni předźěłana.
Po kanalu 1 budu w blišim přichodźe pasažěrske łódźe a čołmiki jězdźić. Potom budu wottud tež cyłodnjowske jězby do 30 resp. 50 kilometrow zdaleneju měšćanskeju přistawow w Ranju a Złym Komorowje móžne. Sprjewinodołski jězor so k wodosportowemu centrumej jězoriny wuwiwa. Wot lěta 2015/2016 nastawa trěbna infrastruktura, kaž nowe dróhi, parkowanišća a twarjenja.
Wot spočatka 2012 přeprošuje blisko sewjerozapadneho brjoha ponyjowy dwór „Terra Nova“, kiž poskićuje jězby z kuču do blišeje wokoliny. Nutřkowne nasypnišćo brunicoweje jamy Sprjewiny Doł pak je njepřistupne pasmo. Tam je něhdyša „Milionowa deponija“, kotruž mjeztym nowa zeleń pokrywa. Hdyž su hórnistwowi eksperća swoje geotechniske hódnoćenje dokónčili, wo dalšim wosudźe tutoho areala rozsudźa. Snadź budu turisća rjaneho dnja zaso na „Małym kamjenju“, wjeršku deponije, stać a wulkotny panorama krajiny we wobkruhu 360 stopjenkow wobdźiwać móc.