Lejno swojim hosćom tójšto skića. We wsy samej so zadani, do cyrkwje pohladać a sej wopomnišćo za Škodow wobhladać, kotrež leži direktnje nad płuwacymi domami. Škodow bu srjedź 1960tych lět Košynskej brunicowej jamje woprowany, z kotrejež je dźensniši Lejnjanski jězor nastał. Při wopomnišću sposrědkuja wjacore taflach wjele zajimawostkow wo regionje.

Při jězorje pak čakaja najwšelakoiše poskitki na aktiwnych dowolnikarjow. Spektrum saha wot kupanskeho přibrjóha přez wšelake družiny wodosporta, kaž wodoski, hač k měrnej turje z čołmikom. Při přistawnym mosće blisko kupanskeho přibrjoha za čas sezony pasažěrska łódź „Aqua Phoenix“ zastawa.

W Lejnom přeprošuja wjacore hosćency a zakuskarnje na wopyt a pozastanje. Tam poskićeja słódnu domjacu jědź. Mjez Lejnom a Ptačecami, direktnje při južnej skłoninje jězora, steji swětłownja, markantny hotelowy a gastronomiski kompleks.

Kolesowarjo a skaterojo maja při Lejnjanskim jězorje wulkotne wuměnjenja, přetož tu je wjele kilometrow derje wutwarjenych kolesowanskich šćežkow. Lejnjanski jězor wobdawa asfaltowany kołopuć. „Připódla“ tangěruješ tež hišće symbol jězoriny: 30 metrow wysoku wuhladnu wěžu „Zerzawy hózdź“. Na Košynskim nasypje njedaloko Borborineho kanala je wuměłstwowy projekt Wojerowskeho Léona Focaultoweho gymnazija wobhladanja hódny.

Štóž ze zjawnymi wobchadnymi srědkami do jězoriny přijědźe, móže bus z připowěšakom za kolesa wužiwać, kotryž w ćopłym počasu stajnje kónc tydźenja na najwažniše městna jězdźi, tak tež do Lejnoho.