We Wojerecach móžeš tójšto dožiwić. W Starym měsće wabi hród, w kotrymž je měšćanski muzej zaměstnjeny. Na dwěmaj poschodomaj so wopytowarjam lětstotki stare stawizny Wojerec zbližeja. Wabjaca je tež wustajeńca, kiž předstaja žiwjenje a tworjenje Jürgena von Woyskeho, Wojerowskeho rězbarja a molerja. Hnydom při hrodźe je coologiska zahroda. Na płoninje šěsć hektarow móžeš na wšěch 100 družin zwěrjatow wobkedźbować. Wot „normalneje“ coologiskeje zahrody so Wojerowska w tym rozeznawa, zo plahuje wudry a je tež slědźenišćo. Wopytowarjo móža so na mału kołojězbu po swěće podać, wšako su tam zwěrjata z kóždeho kontinenta.
Dale so zadani, sej torhošćo z historiskej radnicu a póstowym stołpom wobhladać.
Markantny dypk na Cyrkwinskej hasy je Janska cyrkej, kotruž móžeš sej wšědnje mjez 11 a 17 hodź. wobhladać. Hnydom w susodstwje wije so Dołha hasa. Tu móžeš so do žiwjenja něhdy sławneje Wojerowskeje gildy rjemjeslnikow zanurić. Prastare, pyšne domčki kaž tež historiski horbaty plester tworja wosebity flair. Wo kulturnu zabawu pak so „Kufa” stara – Kulturna fabrika na Piwarskej hasy. Tam će wočakuja wustajeńcy, dźiwadło, kino a tójšto wjac.
W Nowym měsće podaj so na kóždy pad na Łužiske naměsto! We Łužiskim centeru móžeš nakupować a flaněrować, Łužiska hala wabi ze swojim šěrokim kulturnym poskitkom a susodnym parkom. Nimo toho přeprošuje kompjuterowy muzej Konrada Zusy na Dietricha Bonhoefferowej dróze na wustajeńcu wo žiwjenju a skutku wunamakarja kompjutera a wo IT-stawiznach. Swoje młode lěta bě Konrad Zuse mjenujcy we Wojerecach přežiwił. Tež wopyt Łužiskeje kupjele z jeje atraktiwnym poskitkom kupjelow a sawnow so zadani.