We Wojerecach móžeš tójšto dožiwić. W Nowym měsće podaj so na kóždy pad na Łužiske naměsto! We Łužiskim centeru móžeš nakupować a flaněrować; Łužiska hala wabi ze šěrokim kulturnym poskitkom a z parkom w susodstwje.
Jeli so za twarske stawizny zajimuješ, pohladaj hnydom pódla do Budyskeje aleje z typiskimi bydlenskimi blokami 1950tych a 1960tych lět; nimale wšitke su zrekonstruowane. Dom Martina Luthera Kinga je cyrkwinske srjedźišćo w Nowym měsće. Nimo Božich słužbow wotměwa so tam tež wjele zarjadowanjow.
A kompjuterowy muzej Konrada Zusy hnydom w susodstwje, na Dietricha Bonhoefferowej hasy, prezentuje wustajeńcu wo žiwjenju a skutku wunamakarja komputera. Swoje młode lěta bě Zuse mjenujcy we Wojerecach přežiwił. Wopyta hódna je tež Łužiska kupjel ze swojim atraktiwnym poskitkom kupjelow a sawnow.
We wobšěrnje saněrownym Starym měsće wabi hród, w kotrymž je měšćanski muzej zaměstnjeny. Na dwěmaj poschodomaj so wopytowarjam stalětne stawizny Wojerec zbližeja. Hnydom za hrodom je coologiska zahroda. Tam je na šěsć hektarach płoniny něhdźe 100 družin zwěrjatow.
Torhošćo z historiskej radnicu kaž tež póstowy stołp tworitej historiske srjedźišćo města. Markantny dypk na Cyrkwinskej hasy je Janska cyrkej, kotruž móžeš sej tež znutřka wobhladać. Hnydom w bliskosći wije so Dołha hasa. Hdyž maš lóšt, móžeš so w demonstraciskej šewcowni do žiwjenja něhdy sławneje Wojerowskeje gildy rjemjeslnikow zanurić. Wo kulturnu zabawu pak so „Kufa“ stara – Kulturna fabrika na Piwarskej hasy. Tam će wočakuja wustajeńcy, dźiwadło, kino a tójšto wjac.