Krabatowy młyn ma telko zajimawostkow, zo so wodźenje po wulkim młynskim arealu na kóždy pad zadani. Kónc tydźenja su stajnje popołdnju dožiwjenske wodźenja. A w prózdninach móža dźěći tež dyrdomdeje w zwisku z Krabatom-kuzłarjom dožiwić. Krabatowa kolesowanska šćežka, zwjazowaca najwažniše městna w žiwjenju historiskeho Krabata, kiž je jako bajowa postawa dale w ludźe žiwy, pućowacych wězo tež k młynej wjedźe. Najěsć a napić móža so w hosćencu na arealu młyna abo w korčmje wosrjedź Čorneho Chołmca – wuběr jědźow a napojow je wšudźe wulki.
Na Čornochołmčanskej nawsy, kotraž je z lubosću wuhotowana, so zadani pozastać a so rozhladować. Tam steji Marijina cyrkej. Móžeš sej ju tež znutřka wobhladać, jeli so přizjewiš. Hnydom w susodstwje wabi Frenclowy dom – domizniska stwa ze zajimawymi eksponatami, kiž swědča wo stawiznach Čorneho Chołmca. Předewšěm na młodych ludźi su poskitki w Čornochołmčanskej Šuli w zelenym kaž tež w Bibliskim wólnočasnym domje přitřihane. Wobhladać móžeš sej tež Hegewaldec hornčernju. A zawod za přirodne kamjenje blisko wsy poskićuje wodźene tury po swojej skale. Štó je ći w jednotliwym zarjadnišću partner, zhoniš w Krabatowym młynje.
Wojerecy skićeja wopytowarjom tójšto zajimawostkow. K tomu słušeja hród z muzejom, coologiska zahroda hnydom w susodstwje, wobhladanja hódne stare město kołowokoło torhošća, Cyrkwinska hasa a Dołha hasa, Łužiske naměsto z Łužiskej halu a Łužiskim centerom a hišće wjele wjac.