Čorny Chołmc, wjesny dźěl Wojerec, słuša do najstaršich wsow w regionje. 1994 běchu wjesnjenjo 600. róčnicu swojeje wsy woswjećili. Wosebitosć tuteje 800 wobydlerjow ličaceje wsy je němsko-serbske žiwjenje. Ludźo tu tójšto nałožkow z lubosću pěstuja. Žony ze wsy běchu na přikład w lěće 2010 jutrowne spěwanje zaso wožiwili.
Štož pak ludźi najbóle do Čorneho Chołmca ćehnje, je Krabatowy młyn. Pilni a wušikni rjemjeslnicy a wandrowscy běchu jón natwarlili. Při natwarje młyna su tu na stare dobre wašnje nawjazali a pućowacych rjemjeslnikow hospodowali a jim dźěło dali. Tak nasta napodobizna powěstneho “Čorneho młyna”, w kotrymž bě čorny młynk něhdy činkarił. Serbski kuzłar Krabat pak móžeše jeho přelesćić. Młynski areal je cyłe lěto přistupny. Kedźbliwy wopytowar wuhlada tu a tam w Čornym Chołmcu čorneho rapaka – symbol za Krabata, kotrehož bě čorny młynk zakuzłał.
Takrjec hnydom wokoło róžka leža Wojerecy ze swojimi nimale 34.000 wobydlerjemi. Rozrjaduja so do historisce zrosćeneho Stareho města a do Noweho města, kiž bu hakle srjedź 50tych lět natwarjene. Tehdom trjebachu bydlenja za sobudźěłaćerjow płunokombinata w Čornej Pumpje. Tohodla maja Wojerecy tež dwě srjedźišći: historiske wokoło torhošća a Cyrkwinskeje hasy a nowe při Łužiskim naměsće.
Wjacore atrakcije turistow w měsće wočakuja, kaž coologiska zahroda, přewšo moderny kompjuterowy muzej ZCOM w Nowym měsće, hród z muzejom abo Łužiska hala z bohatym poskitkom wusahowacych zarjadowanjow.
Dalše zajimawostki móža sej wopytowarjo we Wojerecam přisłušacych wsach wotkrywać, na přikład młyn na kózłach w Němcach, Ćiskowski dwór w Ćisku abo „Energijowu fabriku“ w Hórnikecach. Nimo toho z Wojerec njeje daloko k přibrjoham łužiskeje jězoriny.