Wojerecy skićeja turistam kopicu zajimawostkow. Kotre dalše město w regionje dźě ma hnydom dwě srjedźišći, mjenujcy w Starym a w Nowym měsće? Historisce zrosćene Stare město so torhošću z radnicu a póstowym stołpom přitula. W bliskim hrodźe je muzej zaměstnjeny. Na dwěmaj poschodomaj móža so wopytowarjo na pućowanje do stawiznow města podać.
Hnydom při hrodźe so coologiska zahroda rozpřestrěwa. Něhdźe 100 družin zwěrjatow přeprošuje na pućowanje po cyłym swěće. Dalše wosebitostki Stareho města su mjez druhim Janska cyrkej, Dołha hasa jako „hasa rjemjeslnikow“, Lessingowy dom kaž tež towarstwowy dom, w kotrymž bu lěta 1912 Domowina - Zwjazk Łužiskich Serbow załožena.
Srjedźišo Noweho města twori Łužiske naměsto. K flaněrowanju přeprošuje Łužiski center z nimale 60 wobchodami. Łužiska hala w susodstwje prezentuje so jako městnosć kultury, hdźež su hižo mnozy znaći wuměłcy wustupili. Kompjuterowy muzej Konrada Zusy, kotryž bu na Dietricha Bonhoefferowej dróze nowy zarjadowany, znazornja stawizny ličakoweje techniki kołowokoło wunamakarja prěnjeho kompjutera Konrada Zusy hač k modernym nastrojam. Swoje młode lěta bě Zuse mjenujcy we Wojerecach přežiwił. Nowe město pyši so ze swojimi zelenišćemi – kćějatymi a z bujnej zelenju a z wuměłstwom wuhotowanymi. Nimo toho maš we Wojerecach atraktiwnu Łužisku kupjel, hat za čołmikowanje, kino, Kulturnu fabriku (KuFa), a po wjacorych kolesowanskich šćežkach dojědźeš sej spěšnje do bliskeje jězoriny.
Hosćenc „K worjołej“ na mjezy mjez Wojerecami a wjesnym dźělom Němcy porjedźa z lubosću spřihotowane tradicionalne sakske jědźe. Zdobom je idealne wuchadźišćo za wotkrywansku turu do Wojerec, k Němčanskemu młynej na kózłach a do Dubrjenskeho bahna.