Łužiska jězorina je najwjetša wot čłowjeka stworjena wódna krajina w Europje. Wjace hač 20 wjetšich wodźiznow z cyłkownej płoninu ca. 15.000 hektarow spožča Łužicy z tym nowe wobličo. Kanale za wobchad z łódźemi zwjazuja dźesać jězorow z dohromady 7.000 ha płoniny.

Łužiska jězorina je wuslědk saněrowanja sćěhow brunicoweho hórnistwa. Hižo srjedź 19. lětstotka běchu prěnje bagry region přerywali. Za dobywanje „čorneho złota“ Łužicy běchu hoberske zasahi trěbne: Wjele serbskich wsow bu wotbagrowanych, přez lětstotki zrosćena kulturna krajina bu zničena a staw dnowneje wody dyrbješe so znižić. Po tym, zo běchu składy wuhla wučerpane, čłowjek nětko cyle nowu krajinu modelěruje. Rozsud, stworić Łužisku jězorinu, skića ludźom a regionej šansu noweho započatka: hač wodosport, kolesowanje, skatowanje,kupanje, flaněrowanje, wočerstwjenje, hač regionalne kulinariske dobroty, industrijna kultura, wjesne žiwjenje, serbska kultura abo přitulne městačka a přećelni ludźo – jězorina za kóždy słód něšto poskića. Turistiska infrastruktura nětko runje nastawa. Hosćo su potajkim swědk toho, kak so krajina přeměnja. Tuž budźe zawěsće zajimawe, hdyž hdys a hdys zaso sem přińdu a pohladaja, što je mjeztym noweho nastało.

Z wjetšich wodźiznow hodźi so hižo połojca turistisce wužiwać. Nimo kolesowanja su dožiwjenja z wodu to najwažniše: wudźenje, płachtakowanje, surfowanje, jetski, wakeboard, ski na wodźe, padlowanje abo stand-up-padlowanje, nurjenje – wšo to a tójšto dalšeho słuša k turistiskim aktiwitam, kiž su we Łužiskej jězorinje móžne.     

Tuž njech Was tutón region – cyle w zmysle Krabata – wobkuzła pod hesłom: Něhdy „Wam k zbožu“ a dźensa „Ahoj!“