Šibojski jězor leži w třiróžku města Wojerec a gmejnow Sprjewiny Doł a Łaz. Rozpřestrěwa so na płoninje 684 ha, štož wotpowěduje něhdźe 977 sportnišćam. Pjelnjenje něhdyšeje Šibojskeje brunicoweje jamy z wodu – dźensnišeho Šibojskeho jězora – bě 2011 dokónčene. Wot 1984 do 1996 běchu tam na 53 milionow tonow brunicy wudobywali. Runje telko waži tež 35 milionow wosobowych awtow. Wjes Šiboj – 1568 prěni raz naspomnjena  – bu jamje woprowana. 23 Šibojčanow dyrbješe so 1986/1987 přesydlić. Wopomnišćo na juhowuchodnym pobrjohu jězora, kiž bu w juniju 2005 poswjećene, dźensa na wjes dopomina. 

Porno druhim jězoram, kiž z brunicowych jamow nastachu, ma Šibojski wulku lěpšinu, zo je kompletny přibrjóh ze zrosćeneje zemje. Tuž njemóže k zesuwanju zemje dóńć.

Šibojski jězor so takrjec k nowej „kupanskej wani“ Wojerowčanow wuwiwa. Na Wojerowskej stronje nastawa kupanski přibróh – jedyn z cyłkownje třoch. Kak by so jězor w přichodźe wužiwać móhł, za to bu wobšěrny plan wudźěłany. Předstajomne su krosnowanska wěža, krosnowanska šćežka, tematiske hrajkanišćo, lěsna zahroda, platforma za wjes Šiboj, prózdninski park kaž tež ekskluziwne bydlenja.

Hižo nětko móžeš Šibojski jězor kolesujo abo skatujo wulkotnje wobkružeć – dźakowano asfaltowanemu kołopućej. Po puću skićeja so wotměnjawe spodobne wuhlady na wodu. Přeco kónc awgusta je při Šibojskim jězoru jedne z najwjetšich triatlonowych zarjadowanjow we Łužicy – KnappenMan.