Nowe Město leži nad Sprjewju. Bjezdwěla sej hłowna rěka našeje Łužicy zasłuži, zo ju porjadnje zańč maš – na přikład čołmikujo. Zahajić móžeš čołmikowanje w Rólic młynje něhdźe dwaj kilometraj za Nowym Městom. A tež Sprjewina kolesowanska šćežka přez Nowe Město wjedźe. Wotrězk w směrje na Sprjejcy a Gródk je wosebje lubozny: Doł bywa tam hladajcy wuši a rěka ćeče po bujnym měšanym lěsu.
W Nowym Měsće samym skića so hosćom wosebita atrakcija: wustajeńca klankow na Wjesnej dróze čo. 29. Wjace hač 2.500 klankow móžeš tam wobdźiwać. Wosebje šikwane pak su z klankami zestajane sceny z bajkow a stawizničkow – jich je wjace hač 100. W lěću je wustajeńca na wjacorych kóncach tydźenja wotewrjena.
Dalša zajimawostka je drjewjany podstaw zwonow na pohrjebnišću. Z wjeski Sprjewiny Doł pochadźacy zwón bu 1992 poswjećeny. Wosebitostka na tutym pohrjebnišću su tři prastare kamjentne křiže. Dopominaja na třoch rubježnych ryćerjow, za swoje njeskutki w Třicećilětnej wójnje wotprawjenych. Wobhladanja hódne je tež sowjetske wopomnišćo w Nowym Měsće. Dopomina na 24 wojakow a dweju oficěrow, kiž běchu we wojowanjach nalěto 1945 při Nowym Měsće padnyli.
We wsy stej dwaj hosćencaj: korčma a pensija „Hamor“, kotraž ma dołhu tradiciju, wšako so 1658 prěni raz naspomnja. Tam porjedźeja słódnu domjacu jědź. Dalši lokal je „Serbska bróžeń“. Hosćenc z pensiju wita hosći tež serbsce z „Witajće k nam“ a porjedźa němske a serbske kulinariske dobroty.
Domizniske towarstwo w Nowym Měsće haji serbske tradicije, kaž serbski kwasny ćah a camprowanje. We wsy maja tež dwurěčnu pěstowarnju, hdźež dźěći we Witaj-projekće serbsce wuknu.
